Námskeið og klúbbar

Bókmenntahópur
Boðið er upp á námskeið í ýmsum sögum. Höfundur viðkomandi verks er oft fenginn til að ræða verk sitt við hópinn.
Hamingja þessa heims eftir Sigríði Hagalín Björnsdóttur er lesefni bókmenntaklúbbsins á haustönn 2023.
Þetta er stór saga sem gerist á 15. öld. Afar lítið er til af skriflegum heimildum frá því tímabili, en Sigríður notfærir sér þann rýra kost sem til er og spinnur sína skálduðu frásögn þar um. Margar persónur koma fyrir og sögusviðið er breitt. Hér er fjallað um valdatafl milli norska konungsríkisins og enskra kaupmanna og skáld, riddarar, hirðstjórar og kvenskörungar stíga fram. Frásagnarhátturinn er flókinn og marglaga og tími sögunnar skiptist milli 15. aldar og samtímans. Allt er þetta efni sem býður upp á lífleg skoðanaskipti og umræður. Mjög spennandi!
(Ef tími vinnst til verður hlaupið yfir Virkisvetur eftir Björn Th. Björnsson. Sú saga fjallar að hluta til um sömu persónur, en er annars mjög ólík).
Í nóvember mun Sigríður Hagalín koma í heimsókn og segja okkur frá skáldverki sínu og er sú heimsókn innifalin í verði.
Leiðbeinandi: Jónína Guðmundsdóttir
Uppbygging námskeiðs: Fjögur skipi á miðvikudögum kl. 13:00-15:00 dagana 20. september, 11. október og 1. nóvember. Fjórði tíminn  með heimsókn höfundar, verður haldinn 22. nóvember.
Verð: 8.500 kr. 

Enskunámskeið (fyrir byrjendur og lengra komna)
Enskukennsla með áherslu á talað mál. Lagt er upp með að námið sé hagnýtt og að fólk nái að bjarga sér á spjalli við enskumælandi fólk, fremur en verið sé að læra flókna málfræði. Námsgögn innifalin í verði.
Leiðbeinandi: Margrét Sölvadóttir
Uppbygging námskeiðs: tvisvar sinnum í viku í 4 vikur hvert námskeið. Ný námskeið hefjast 6. febrúar 2023
Verð: 14.000 kr.

Íslendingasögur
Fornsagnanámskeið þar sem teknar eru fyrir mismunandi Íslendinga- og/eða fornaldarsögur.
Á haustönn 2023 er ætlunin að lesa Orkneyinga sögu – en á vorönn 2024 munum við taka Egils sögu fyrir.
Orkneyinga saga er nokkuð löng saga og nær yfir langt tímabil þar sem greint er frá jörlum Orkneyinga, lífi þeirra, ástum og örlögum. Leikurinn berst um vítt svið, einkum til Noregs, Skotlands, Suðureyja og Írlands. Við fræðumst furðu mikið um Noregskonunga sem blanda sér mjög í málefni eyjanna. Sagan er afar skemmtilega skrifuð og þar eru margir snilldarprettir. Að uppruna er Orkneyinga saga gömul (eldri en elstu Íslendingasögur) en varðveisla hennar er nokkuð flókin. Ljóst virðist þó að hún hefur haft mikil áhrif á sjálfan Snorra Sturluson. Það verður því fróðlegt að lesa Egils sögu á vorönn 2024 eftir að hafa farið yfir Orkneyinga sögu!
Nánar um Egils sögu síðar.
Leiðbeinandi: Baldur Hafstað
Uppbygging námskeiðs: Einu sinni í viku á föstudögum í 10 vikur hvert námskeið. Hóparnir verða tveir, sá fyrri kl. 10–12 (einnig í boði í gegnum fjarfundarbúnaðinn ZOOM) og sá seinni kl. 12:30–14:30. Haustönn hefst 15. september.
Verð: 22.500 kr.

Ljóðahópur
Þar leiðir Jónína hópinn og velur efni í samstarfi við aðra þátttakendur.
Leiðbeinandi: Jónína Guðmundsdóttir
Uppbygging námskeiðs: Tvisvar sinnum í mánuði á  fimmtudögum í þrjá mánuði í senn. Sjá nánari dagsetningar í Viðburðadagatali.
Verð: 4.000 kr.

Myndlistarnámskeið
Almennt byrjendanámskeið í myndlist fyrir eldra fólk. Tilgangur námskeiðsins er fyrst og fremst að auka færni og þor þátttakenda til að fást við myndlist sem gefandi frístundaiðju.
Fjallað verður um skynjun og skoðun, skilning og sköpun sem samofna þætti í myndlistariðkun. Farið verður í nokkur grundvallaratriði myndgerðar, svo sem litafræði, myndbyggingu, fjarvídd, hlutföll mannslíkamans og formfræði tvívíddar og þrívíddar. Kynnt verður mismunandi tækni og rætt um hefðir og stefnur með vísan í listfræði og sögu eftir því sem við á. Þátttakendur leysa ýmis verkefni með skissubók og einföldum áhöldum svo sem blýanti, litblýöntum olíukrít og vatnslitum. Áhersla er lögð á samræður og skoðanaskipti í tímum.
Auk verkefna í tímum er reiknað með að þátttakendur vinni heimaverkefni milli kennslustunda og heimsæki söfn og sýningar meðan á námskeiðinu stendur.
Kennari: Bjarni Daníelsson
Efni og áhöld: Stór og góð skissubók, A4 eða stærri. Einföld teikniáhöld og litir að eigin vali (frekari efniskaup í samráði við kennara)
Uppbygging námskeiðs: Einu sinni í viku á mánudögum í 3 klst. í senn (frá kl. 13 – 16) í 10 vikur. Fyrsti tími er mánudagurinn 18. september
Verð: 42.000 kr.

Skákfélagið Æsir
Teflt er einu sinni í viku nær alla mánuði ársins á þriðjudögum kl. 13:00. Mjög góður hópur iðkar taflmennsku hér hjá FEB og er klúbburinn virtur á meðal skákmanna.
Formaður: Garðar Guðmundsson

Spænskunámskeið (fyrir byrjendur og lengra komna)
Spænskukennsla þar sem farið er yfir framburð og nokkur undirstöðuatriði í málfræði. Aðaláherslan verður á talað mál og orðaforða. Námskeiðunum verður skipt upp í þrjá hópa:
– Spænska 1 er ætluð byrjendum
– Spænska 2 er ætluð þeim sem eitthvað eru komnir af stað
– Spænska 3 er ætluð þeim sem lengra eru komnir og því freistandi að hafa kennsluna að öllu leyti á spænsku – eða eins mikið á spænsku hægt er.
Leiðbeinandi: Kristinn R. Ólafsson
Uppbygging námskeiðs: tvisvar sinnum í viku í 6 vikur hvert námskeið. Fyrsta námskeiðið hefst mánudaginn 30. október .
Verð: 24.000.