Námskeið og klúbbar

Bókmenntahópur FEB
Boðið er upp á námskeið í ýmsum sögum.
Á haustönn 2026 ætlum við til (endur-) fundar við Laxness.
Bókmenntaklúbburinn stekkur á Laxness-vinsældavagninn!
Haustið 2025 hófst mikil umræða í fjölmiðlum, á samfélagsmiðlum og milli manna um minnkandi lestur á verkum Halldórs Laxness. Í kjölfarið jókst lestur á verkum hans, og nú er enginn maður með mönnum nema hafa gullkorn úr bókunum á takteinum. Við viljum engir eftirbátar vera og lesum Laxness þetta haustið.
Fyrstu tvö skiptin er það Sjálfstætt fólk. Flest hafa lesið bókina, en hún þolir marga lestra og verður bara betri og betri. Sjálfstætt fólk er uppáhaldsbók mjög margra, bæði á Íslandi og víða um heim. Meira um það í fyrsta tímanum!
Þá lesum við, greinum og túlkum bernskuminningar Halldórs, í túninu heima, og á síðasta fundi haustsins lesum við tvær smásögur og nokkur ljóð. Við ákveðum saman hvaða sögur og hvaða ljóð.
Dagskrá haustsins 2026
Miðvikudagur 23. september kl. 13-15:
– Stutt kynning á dagskrá haustins.
– Sjálfstætt fólk, fyrstu tveir hlutar bókarinnar. Þeir heita Landnámsmaður Íslands og Skuldlaust bú. Þetta er u.þ.b. helmingur sögunnar. Umræður í hópum og önnur verkefni.
Miðvikudagur 14. október kl. 13-15:
– Seinni hluti Sjálfstæðs fólks. Við vinnum úr sögunni á fjölbreyttan hátt eftir því sem tíminn leyfir.
Miðvikudagur 11. nóvember kl. 13-15:
– Í túninu heima. Við förum yfir bókina, vinnum úr textanum og deilum lestrarreynslu.
Miðvikudagur 2. desember kl. 13-15:
– Tvær smásögur og nokkkur ljóð sem við veljum í sameiningu.
– Uppgjör námskeiðsins.
– Hvað viljum við gera eftir áramót?
Sjálfstætt fólk fæst í þægilegri kilju-útgáfu með nútíma stafsetningu og orðskýringum.
Leiðbeinandi: Ragnhildur Richter
Uppbygging námskeiðs: Fjögur skipti á miðvikudögum kl. 13:00-15:00 dagana 23. sept., 14. okt., 11. nóv. og 2. des.
Verð: 11.000 kr.

Íslendingasögur
Fornsagnanámskeið þar sem teknar eru fyrir mismunandi Íslendinga- og/eða fornaldarsögur.
Á haustönn 2026 verður Völsunga saga tekin fyrir.
Völsunga saga var skráð um eða skömmu eftir 1250 og er að nokkru leyti byggð á hetjukvæðum eddukvæða. Fyrsti hluti sögunnar á sér þó ekki þekktar fyrirmyndir og segir m.a. frá Völsungi, Sigmundi, Signýju og Sinfjötla, afkomendum Óðins. Sagan geymir líka dýrmætar upplýsingar um tiltekin atriði hetjusögunnar þar sem eyða er í Konungsbók eddukvæða.
Höfundi þessarar sögu tekst furðuvel að vinna úr frásögnum hetjukvæða eddu og bræða saman misvísandi heimildir kvæðanna, og úr verður hrikaleg frásögn um það böl sem græðgi og svik geta valdið. En áhrifin koma víðar að, frá Snorra-Eddu, Þiðreks sögu af Bern og jafnvel Niflungaljóðunum þýsku.
Richard Wagner nýtti sér efni Völsunga sögu (og aðrar norrænar heimildir) þegar hann samdi óperurnar fjórar, Niflungahringinn, þótt hann færi mjög frjálslega með efnið. Þetta hefur sannarlega aukið hróður sögu okkar.Sama er að segja um J.R.R. Tolkien og verk hans. Hann kynntist Völsunga sögu ungur og heillaðist af norrænum arfi.
Völsunga saga hefur verið gefin út með Fornaldarsögum Norðurlanda en er einnig til í góðri skólaútgáfu sem Örnólfur Thorsson annaðist. Sú útgáfa er líklegast ófáanleg nema á söfnum og hugsanlega í fornbókaverslunum. Á netinu má finna söguna á slóðinni: https://www.snerpa.is/net/forn/volsung.htm
Nýir þátttakendur eru boðnir velkomnir og einnig allir sem áður hafa verið með okkur.
Leiðbeinandi: Baldur Hafstað
Uppbygging námskeiðs: Einu sinni í viku á föstudögum í 10 vikur hvert námskeið. Hóparnir verða tveir, sá fyrri kl. 10–12 (einnig í boði í gegnum fjarfundarbúnaðinn ZOOM) og sá seinni kl. 12:30–14:30.
Haustönn 2026 hefst föstudaginn 18. september 2026  og síðustu tímarnir eru þá á áætlun föstudaginn 20. nóvember
Verð: 23.000 kr.

Matarklúbbur FEB fyrir karlmenn 60+
Langar þig í matarklúbb með öðrum körlum?
Langar þig að læra að elda einfaldan mat?
Hefur þú lítið stuðningsnet og/eða ert óvanur að elda?
Eða langar þig bara að koma og vera með?
Þú þarft ekki að hafa reynslu af matseld til að taka þátt, bara að langa til að elda og/eða að læra að elda og að borða í góðum félagsskap.
Leiðbeinandi: Er i vinnslu.
Uppbygging námskeiðs: Einu sinni í viku í nokkrar vikur hvert námskeið. Í vinnslu er hvenær námskeiðið byrjar
Verð: kemur síðar

Myndlistarnámskeið
Tilgangur námskeiðsins er fyrst og fremst að auka færni og þor þátttakenda til að fást við myndlist sem gefandi frístundaiðju.
Kennari: Er í vinnslu
Efni og áhöld: Kemur síðar
Uppbygging námskeiðs: Kemur síðar
Verð: Kemur síðar 

Skákfélagið Æsir
Teflt er einu sinni í viku nær alla mánuði ársins á þriðjudögum kl. 13:00. Mjög góður hópur iðkar taflmennsku hér hjá FEB og er klúbburinn virtur á meðal skákmanna.
Formaður: Garðar Guðmundsson

Spænskunámskeið (fyrir byrjendur og lengra komna)
Spænskukennsla þar sem farið er yfir framburð og nokkur undirstöðuatriði í málfræði. Aðaláherslan verður á talað mál og orðaforða. Námskeiðunum verður skipt upp í þrjá hópa:
– Spænska 1 er ætluð byrjendum (mánud. og miðvikud. frá kl. 9:00 – 10:30)
– Spænska 2 er ætluð þeim sem eitthvað eru komnir af stað (miðvikud. kl. 10:45 – 12:15 og fimmtud. kl. 12:30 – 14:00)
– Spænska 3 er ætluð þeim sem lengra eru komnir og því freistandi að hafa kennsluna að öllu leyti á spænsku – eða eins mikið á spænsku hægt er (mánud. kl. 10:45 – 12:15 og fimmtud. kl. 14:15 – 15:45)
Leiðbeinandi: Kristinn R. Ólafsson
Uppbygging námskeiðs: tvisvar sinnum í viku í 8 vikur hvert námskeið. Næstu námskeið hefjast á haustönn 2026 þ.e. mánudaginn 12. október 2026.
Verð: 32.000 kr.