InnanlaNdsferðir
Hinar einu og sönnu FEB-innanlandsferðir árið 2026
FEB-ferðir efna til fjölbreyttra ferða víða um land í sumar eins og endranær. Síðasta sumar vorum við með nokkrar nýjungar eins og gönguferð frá Ölkelduhálsi yfir í Grafning og styttri gönguferðir nálægt höfuðborginni undir leiðsögn Jónatans Garðarssonar sem við ætlum að endurtaka sumarið 2026. Meðal nýjunga innanlands verðum við með göngu á Grænahrygg sem er dagsferð og þriggja daga ferð norður á Strandir. Vinsælustu ferðir síðustu ára verða einnig á sínum stað, eins og ferðin til Vestmannaeyja, um Snæfellsnes út í Flatey, um Fjallabaksleið nyrðri, í Kerlingarfjöll og Hveravelli, svo eitthvað sé nefnt.
MAÍ
Söguferðir á slóðum Kormákssögu (19. og 26. maí)
Tvær tveggja daga ferðir í Húnavatnsþing á slóðir á Kormáks sögu og Hallfreðar sögu vandræðaskálds í framhaldi af fornsagnanámskeiði FEB á haustönn 2025. Fyrri daginn verður ekið fyrir Vatnsnes eftir hádegishressingu á Hvammstanga. Ekið að fremstu bæjum í Miðfirði (Tungu, jafnvel Gnúpi). Minnumst Kormáks þar og ástarfunda hans með Steingerði. Hugsum líka til Grettis á Bjargi og Miðfjarðar-Skeggja sem um tíma átti vingott við ógæfustúlkuna Helgu, dóttur Bárðar Snæfellsáss. Kvöldverður, kvöldvaka og gisting á Laugarbakka. Seinni daginn verður farið yfir í Dali, hádegissnarl í Leifsbúð í Búðardal og haldið þaðan snögga ferð í Saurbæ áður en ekið er til Reykjavíkur.
Fararstjóri: Baldur Hafstað.
Verð: 61.000 kr. á mann í tvíbýli en 70.000 kr. á mann í einbýli (5.750 kr. bætast við ef þátttakandi er utanfélagsmaður)
JÚNÍ
Vestmannaeyjar (2. og 15. júní)
Tvær dagsferðir til Vestmannaeyja. Ekið sem leið liggur austur fyrir Fjall og í Landeyjahöfn, þar sem Herjólfur bíður okkar, og ferjar bæði rútu og hópinn yfir til Eyja. Þar byrjum við á að aka út á Eiðið áður en við fáum hádegisverð á Tanganum. Maturinn er innifalinn í verði ferðar. Eftir hádegi liggur leiðin m.a. inn í Herjólfsdal út á Stórhöfða, um „nýja hraunið“ og Skansinn, áður en við förum í Eldheima og kynnum okkur afleiðingar Heimaeyjargossins í janúar 1973. Þaðan fer svo hópurinn aftur um borð í Herjólf og ekur síðan til Reykjavíkur.
Leiðsögumaður: Kári Jónasson.
Erfiðleikastig: 1 skór.
Verð: 24.000 kr. (3.000 kr. bætast við ef þátttakandi er utanfélagsmaður)
Reykjanes, Grindavík, Vatnsleysuströnd (18. júní)
Lagt af stað frá Stangarhyl kl. 09:00. Ekið sem leið liggur áleiðis suður með sjó og inn á gamla Keflavíkurveginn. Heimsækjum Kálfatjörn, skoðum kirkjuna og fræðumst um staðinn. Ekið eftir Vatnsleysuströnd þar til komið er í Voga og á leiðinni er fræðsla um sögu byggðarinnar. Eftir hring um Vogana er haldið áfram til Grindavíkur. Þar tekur við fræðsluferð um Grindavík undir leiðsögn heimamanns, sem segir sérstaklega frá afleiðingum jarðhræringa og eldgosa, sem og frá uppbyggingaráformum á staðnum. Að þessari skoðunarferð lokinni er hádegishressing á veitingahúsinu Bryggjunni í Grindavík. Að hádegisverðinum loknum er ekið vestur með suðurströndinni, staldrað við hjá Brimkatli þar sem stoppað er í stutta stund við útsýnispall sem þar hefur verið reistur. Ekið áfram vestur eftir Reykjanesskaganum, fram hjá Höfnum og sem leið liggur að Hvalsneskirkju þar sem við fáum leiðsögn um kirkjuna og síðdegiskaffi á Kaffi Golu. Að lokinni kaffihressingu liggur leiðin síðan áfram í Sandgerði, og þaðan til Reykjanesbæjar og síðan áfram heim á leið. Reiknað með að ferð ljúki um kl. 18 í Stangarhylnum.
Fararstjóri: Ásgeir Eiríksson
Verð: 19.500 kr. (3.000 kr. bætast við ef þátttakandi er utanfélagsmaður)
Styttri gönguferð (líklega vika 26 – hluti úr degi)
Endurtökum leikinn frá því í fyrrasumar og förum í áhugaverða göngu með Jónatani Garðarssyni í nágrenni höfuðborgarinnar. Margir áhugaverðir staðir koma til greina hér við borgarmörkin og munum við kynna síðar hvað verður fyrir valinu.
Tímalengd: 3-4 tímar.
Leiðsögumaður: Jónatan Garðarsson.
Erfiðleikastig: 2 skór.
Verð: 3.500 kr.
Snæfellsnes og út í Flatey (25. til 26. júní – tveggja daga ferð)
Ekið frá Stangarhyl í Reykjavík sem leið liggur upp í Borgarnes þar sem verður stutt viðdvöl. Síðan liggur leiðin að Ytri- Tungu á Snæfellsnesi, en þar má oft sjá seli. Farið að Arnarstapa og gengið þar um. Hádegishressing. Ekið fyrir Jökul og að Hellissandi, áfram um Ólafsvík og Grundarfjörð til Stykkishólms, þar sem gist verður á Hótel Stykkishólmi og borðað. Daginn eftir er svo siglt með ferjunni Baldri út i Flatey, þar verður gengið um þorpið með kunnugum og kíkt á fuglalífið. Siglt til baka með ferjunni um hádegisbil. Hádegishressing og skoðunarferð í Stykkishólmi áður en haldið er suður til Reykjavíkur.
Leiðsögumaður: Kári Jónasson.
Erfiðleikastig: 2 skór.
Verð: 78.500 kr. á mann í tvíbýli en 95.500 kr. á mann í einbýli (5.750 kr. bætast við ef þátttakandi er utanfélagsmaður)
JÚLÍ
Njáluslóðir Suðurland (1. júlí og 8. júlí)
Tvær dagsferðir þar sem Guðni Ágústsson leiðir okkur á slóðir Hallgerðar Langbrókar og Njálsbrennu. Fyrsti viðkomustaður er Selfoss þar sem gengið verður um nýja miðbæinn og svo næst stoppað í Laugardælakirkju austan við Selfoss. Þar verður sagt frá Bobby Fischer. Þaðan verður haldið að Odda á Rangárvöllum, áður en komið er í Hótel Fljótshlíð í Smáratúni, þar sem snædd verður kjötsúpa. Í framhaldinu er ekið að Hlíðarenda og svo yfir í Gunnarshólma þar sem Gunnar sneri aftur. Þá liggur leiðin suður að Bergþórshvoli og þaðan á Hvolsvöll í kaffi og pönnsur áður en haldið verður til Reykjavíkur.
Fararstjóri: Guðni Ágústsson.
Verð: 19.500 kr. (3.000 kr. bætast við ef þátttakandi er utanfélagsmaður)
Norður Strandir (10. – 12. júlí – tveggja nátta ferð)
FEB-ferðir hafa á undanförnum árum efnt til ferða á sunnanverða og norðanverða Vestfirði, en nú er komið að því að fara norður á Strandir. Ekið um Holtavörðuheiði og norður með Hrútafirði, um Bitru að Sauðfjársetrinu við Steingrímsfjörð þar sem sýningin verður skoðuð og þar verður boðið upp á hádegishressingu. Síðan liggur leiðin til Hólmavíkur og Galdrasýningin þar skoðuð. Þá verður haldið að Drangsnesi þar sem hópurinn gistir og borðar á Malarhorni. Gistihúsið er rétt við hlið sundlaugarinnar á staðnum og spölkorn frá eru vinsælir heitir pottar í fjörukambinum. Daginn eftir verður svo haldið norður eftir og komið við í Djúpuvík og Baskasetrið heimsótt. Næsti áfangastaður verður svo Trékyllisvík og Norðurfjörður þar sem hópurinn skoðar sig um og fær hádegishressingu. Síðan liggur leiðin í Krossneslaug og það er eins gott að muna eftir sundfötunum í þessari ferð. Á leiðinni til baka verður komið við á Gjögri og svo aftur í Djúpuvík. Á þriðja degi verður hugsanlega farið út í Grímsey, en það fer eftir veðri og vindum. Frá Drangsnesi liggur svo leiðin um Þröskulda og Gilsfjörð yfir á Skarðsströnd þar sem komið verður við á Skarði. Síðan fyrir Klofning um Fellsströnd og komið við í Búðardal á leiðinni suður til Reykjavíkur.
Leiðsögumaður: Kári Jónasson, en sögumaður á Ströndum er Lýður Sörlason sem er fæddur þar og uppalinn.
Erfiðleikastig: 2 skór.
Verð: 125.000 kr. á mann í tvíbýli en 134.900 kr. á mann í einbýli (8.500 kr. bætast við ef þátttakandi er utanfélagsmaður)
Fjallabaksleið nyrðri (16. júlí – dagsferð)
Enn á ný efnir FEB til dagsferðar um Fjallabaksleið nyrðri með brottför úr Stangarhylnum. Eins og áður er fyrsti viðkomustaður Þjórsárdalur. Þaðan verður ekið rakleiðis inn í Landmannalaugar, þar sem gestir taka upp nesti sitt og skoða sig um. Þá verður haldið um Jökuldali og Eldgjá í Hólaskjól. Síðan verður ekið niður Skaftártungu og um Vík . Kvöldmatur á Hótel Dyrhólaey, sem er innifalinn í verði, bíður ferðalanga áður en haldið verður til Reykjavíkur. Um nokkuð langa ferð er að ræða og ekið um hálendisvegi yfir ár og læki. Þetta er ekki mikil gönguferð en þátttakendur þurfa að vera vel búnir fyrir hálendisferð.
Leiðsögumaður: Kári Jónasson.
Erfiðleikastig: 1 skór.
Verð: 25.500 kr. (3.000 kr. bætast við ef þátttakandi er utanfélagsmaður)
ÁGÚST
Gönguferð um Jökulgil, að Grænahrygg og Uppgönguhrygg (dagsferð áætluð í viku 33)
Lagt af stað snemma dags úr Stangarhylnum. Um þriggja tíma akstur er að ræða inn að Landmannalaugum. Á áætlun er að fara upp Landssveitina og inn Dómadal. Reiknað er með að gangan hefjist við Landmannalaugar á ellefta tímanum. Gengið er inn Jökulgilið, fyrst þurrum fótum en síðan er áin þveruð á vaðskóm. Jökulgil er undraheimur út af fyrir sig. Eftir 5-6 km göngu er vaðið yfir ána enn einu sinni og gengið upp gil sem leið liggur upp á Hrygginn milli gilja og að Grænahrygg. Þar er hentugt að taka sér nestispásu. Síðan er farið til baka niður gilið og gengið áfram inn Jökulgil að Hattveri. Mögulegt er að komast að litfögrum stuðlabergskletti úr ríólíti í Hattveri ef liggur vel á ánni. Þaðan er gengið að Uppgönguhrygg og upp hann. Uppgönguhryggur er mjög sérstakt náttúruvætti sem á fáa sína líka. Þegar upp er komið er rétt að ganga upp á Skalla, ef veður er gott, til að njóta útsýnisins. Þaðan er gengið sem leið liggur niður að Landmannalaugum og hringnum lokað. Ferðin tekur 8-9 klst.
Leiðsögumaður: Gunnlaugur A. Júlíusson.
Erfiðleikastig: 3 skór.
Verð: 28.000 kr. (3.000 kr. bætast við ef þátttakandi er utanfélagsmaður)
Ganga frá Ölkelduhálsi yfir í Grafning (dagsferð áætluð í viku 34)
Lagt af stað úr Stangarhyl og ekið austur Hellisheiði og að Ölkelduhálsi.
Gengið er frá Ölkelduhálsi framhjá fallegu hverasvæði á hálsinum og þaðan norður fyrir Ölkelduhálshnúk og neðan við Tjarnarhnúk. Þá er gengið meðfram Álftatjörn og síðan tekinn smá krókur til að kíkja á Kattartjarnirnar tvær. Gengið er niður hið stórkostlega Tindgil og síðan að Ölfusvatnsánni og þaðan niður í Grafning. Gönguleið er um 13 km.
Leiðsögumaður: Einar Skúlason.
Erfiðleikastig: 3 skór.
Verð: 23.000 kr. (3.000 kr. bætast við ef þátttakandi er utanfélagsmaður)
Kerlingarfjöll og Hveravellir (25. til 26. ágúst – tveggja daga ferð)
FEB-ferðir hafa undanfarin ár efnt til ferðar í Kerlingarfjöll og inn á Hveravelli og gera það sama sumarið 2026. Lagt er af stað úr Stangarhylnum að morgni og ekið sem leið liggur að Gullfossi og þaðan inn á Hveravelli, gengið um hverasvæðið, kíkt m.a. á dvalarstað Eyvindar og Höllu, frægasta útilegufólks Íslandssögunar. Síðan er haldið í Kerlingarfjöll í dýrindis kvöldverð og gistingu eina nótt. Daginn eftir verður farið í gönguferð um Hveradali þar sem við blasir mikil litadýrð og bullandi hverir. Þátttakendur þurfa að vera vel útbúnir til gönguferða og vanir göngu í umhverfi sem þessu. Þarna er gengið upp og niður göngustíga sem hafa verið lagðir á undanförnum árum. Síðan verður haldið suður á bóginn á ný með viðkomu á Geysi.
Leiðsögumaður: Jónas Valdimarsson.
Erfiðleikastig: 3 skór – ekki ferð fyrir mjög lofthrædda.
Verð: 89.000 kr. á mann í tvíbýli. Ath eingöngu í boði 2 manna herbergi (5.750 kr. bætast við ef þátttakandi er utanfélagsmaður)
SEPTEMBER
Styttri gönguferð (upp úr miðjum september – hluti úr degi)
Áhugaverð ganga með Jónatani Garðarssyni í nágrenni höfuðborgarinnar. Margir athyglisverðir staðir koma til greina hér við borgarmörkin og munum við kynna síðar hvað verður fyrir valinu.
Tímalengd: 3-4 tímar.
Leiðsögumaður: Jónatan Garðarsson.
Erfiðleikastig: 2 skór.
Verð: 3.500 kr.
Flokkun ferða:
Flokkun ferða, er frá einum skó upp í þrjá skó. Flokkun ferða er einungis til viðmiðunar. Ófyrirsjáanlegar ytri aðstæður, eins og breytingar í veðri, geta breytt erfiðleikastigi ferðar.
Einn skór: Létt ganga, ekki mjög gróft yfirborð. Engar, eða litlar ár. Flestum fært sem ekki nota göngugrind eða hjólastól. Léttur dagpoki.
Tveir skór: Þátttakendur þurfa að vera í nokkuð góðri gönguþjálfun. Göngutími getur verið allt að 3-6 klst. Landslag getur verið hæðótt og nokkuð gróft. Léttur dagpoki. Mælt með göngustöfum.
Þrír skór: Þátttakendur þufa að vera í góðri gönguþjálfun. Nokkuð langar gönguleiðir (6-8 klst.). Gönguleið getur verið í fjalllendi, þar sem yfirborð getur verið grýtt og litlar ár. Léttur dagpoki. Göngustafir eru nauðsynlegir.
Bókanirí ferðirnar hefjast mánudaginn 23. mars kl. 10:00 og fara fram á skrifstofu FEB og í gegnum síma 588 2111. Eftir kl. 10:00 þann 23. mars er einnig hægt að senda póst á netfangið feb@feb.is til að bóka sig – til að gæta samræmis er póstur fyrir þann tíma ekki tekinn gildur. Undantekning frá þessu bókunarferli eru bókanir í „Söguferðir á slóðum Kormákssögu (19. og 26. maí)“ – en þar njóta þátttakendur á fornsagnanámskeiði FEB forgangs.
Athugið :
Félagið áskilur sér rétt til að fella niður einstakar ferðir vegna veðurs, ónógrar þátttöku eða af öðrum ástæðum.
Verð geta breyst m.v. breyttar forsendur þegar líða tekur á sumarið.